Seguici su

Ill Baccaiäd

Al giurnäl e la pagina di mort (di Pietro “Pedar” Rebecchi)

Ill Baccaiäd è la rubrica in dialetto piacentino a cura di Pietro “Pedar” Rebecchi per i lettori di sportelloquotidiano.com (foto di Marco Caviglioni)

Pubblicato il

Gh’é dill rob c’ho mäi capì di mé cuncittadein, am sum anca sfursä, m’an gh’é mia stä ‘d vérs. Pr’esempi la mania da cuminciä a leś al giurnäl dalla fein, parché gh’é la pagina di mort, magäri alla matteina bunura parché sa möra al cugniä dal cüsein dal fradell dal sò visein ad cà sia mäi ditta chi’la vegnan a savì dopa i’ätar e  mëttas a dré a fä passä tütt ill cunduglians, dadnans un bell caffé is seintan in päs cul mond. E l’é una roba propi atavica, tramandä da generasion a generasion. Am ricord mé nonna quand la vadiva una fotu cun tant ad num insima cla pagina lé e magäri agh gniva al dübbi che un täl al pudiva iess un cunusint o un pareint alla luntanissima, allura partiva un gir ad telefunäd, una lettüra riga par riga dill cunduglians e un quälca sacranon parché “as pöl mia mëtt una fotu ad veint’ann prima”, l’agitasion l’as placcäva sultant quand l’äva decis,al di la di ogni ragionevole dubbio, se al povar disgrasiä  l’era ‘l cäs da fä mëtt dü righ tant da salvä tütt la famiglia (fein al terś gräd almenu) da una figüra barbeina. E si parché lalur ca g’ha ‘l mort in cà gh’intaressa bein abota dill cunduglians ad gint ca magäri i vëdan mia da veint’ann.

Sum cunvint che una parola o un bell abrass i välan pössé, ma’d ‘bota, ad quattar righ sutta una cruś. I giuan, fortünatameint is cumportan in manéra divérsa, in dl’epuca dla comünicasion immediä un bell messag’ e via c’andum almenu l’é indirissä alla parsona verameint interessä mia par fä vëd anca a i’ätar cus té fatt. Mé ho lassä lé da un peś da fäia, se ‘l lüttu l’ha culpi un mé amis vagh al füneräl e agh mëtt la mé fassia e la mé vus. Ätar esempi, sarà süccess a tütt, at gh’è da fä i’esam dal sangu, at fä la prenutasion un mes prima par preparä la strategia, t’urganiś la giurnä lavurativa dal dé prima e dal dé dopa in möd e manéra che un piccul ritärdi al ta vaga mia a incasinä la vita.

Alla matteina, prima dal preliev, at gh’é mia da fä culasion però at’ta dësd d’istess mesura prima par ‘rivä bunura, la bärba t’lé fatta alla sira, cullegameint ad almenu tri satellit ch’it pölan dä una man a sarcä ‘l pustegg’ pössé a tacca all’uspedäl. At ‘riv dadnas alla porta dal repärt, at guärd l’arlog’, sett ur, cunteint cme un cavastarlein parché t’é talmeint in anticip che l’infarmera cla g’ha da sbüśät l’é ancura cun la tésta puggiä in sal cüsein. T’é śà drè a pinsä che ista voota at farä mia culasion con un piatt ad pastasütta ma ‘t vér la porta e at vëd lur, i pensiunä, quäldoin ancura impegnä a mëtt alla via la teinda ca i’han druä da doram in dal giardein ad l’uspedäl, ätar chi guärdan al nümar e i peinsan : “Al mè l’é bass abota, al tò t’al dröv gnian da śügä al lott, dorma dorma”. E tütt, indistintameint, it guärdan cun cla fassia da…am dispiäs ma tò fargä anca ista vota. Sa si bon da fägla capì che vöi c’al g’ha gnin da fä al pudriss anca dä la precedeinsa a chi va a laurä par pagägh la pension si bräv, mè g’ho rinunciä

Un po’ la stéssa roba sücceda dal pristinär o al süpermarcä, t’é at gh’è al logh a iess da frëssa, at catarä seimpar al pensiunä cul giurnäl sutta al brass (par guardä i mort) e cul litar ad latt e un miccon in dal cestein e guäi a fägh nutä ca gh’è la “cassa veloce” automatiśśä, vöt mëtt la suddisfasion da cüntä i centesim dadnas alla casséra e guardä quand la striscia la tesra e i “pont magiustar” i van chi vulan ?

 Pietro “Pedar” Rebecchi


> Se sei su Facebook, segui Sportello Quotidiano cliccando qui
> Se ti piace leggere gli approfondimenti di Sportello Quotidiano, scopri la raccolta cartacea cliccando qui

Nato a Piacenza nel 1966, ha sempre coltivato al passione per la cultura piacentina. Grande tifoso del Piacenza Calcio, è anche autore e attore teatrale della "Famiglia Piasinteina":

Clicca per commentare

Lascia un Commento

Il tuo indirizzo email non sarà pubblicato.