I déś cumandameint (di Pietro “Pedar” Rebecchi)

Donca, mè ‘l sò mia s’esista un paradis e un inferan, però am sum ciappä la briga da dä un’ucciä ai déś cumandameint, atsé, par fäm un’idea dla peniteinśa cm’aspétta. Vadum un po’.

Non avrai altro Dio all’infuori di me

Menu mäl, parché veda g’ho śà di gross prublema cun Té e una müccia da dmand da fät se un dé s’incuntrarum e t’al sé belle ca mè sum vöi pulemich che mia bon da täs, ärmat pür ad pasinśa cär al mé om.

Non nominare altro Dio all’infuori di me

Sarum mia un po’ gelus è par cäs? Ma va tranquill che quand vula via dill marianass peins seimpar a Té e sultant a Té. Si si al sò bein, bisugnariss mia ma can dal tò mond dill vot i scappan propi parché sücceda dill rob ca pär c’agh sia vöi lamò in äria c’al sa diverta a vëdat tribülä.

Ricordati di santificare le feste

Ah bein veda sa par santificä ill fèst s’inteinda fä indigestion ad turtei (i battalabar è, mia chi turtei longh quattar cintimetar chi fann adess!) e anvein pudriss andä in gir vistì ad bianch con una bella cruś russa pittürä dadnans e oltretütt al bianch e russ al mé seimpar savì cär abota.

Onora il padre e la madre

Ahia. I diśan seimpar che un fiö atsé luch i pudivan mia fäl… am sà ag’ho da migliurä chemò.

Non uccidere

Agh sum, chemò agh sum… pr’adess, però at pudiva iess anca un po’ pösé precis ma vagh in fidücia e crëd che ciribigul, panaron e ragn’ i cöintan mia.

Non commettere atti impuri 

Che minera! A pärt al fatt ca mé sum una parsona pulida e ad solit dopa am läv, prima e dopa. E po’ scüsam ma se atsoi aviss fat un quälca “atto impuro” Adamo ed Eva i sarissan ancura lamò da par lur a rangugnä cul pum in man. Cosa? T’indiva mia atsè ? Eh bein allura spiegat però che dopa noi chemò fum dal regò.

Non rubare

Oh là, almenu vöi l’ho rispettä. A menu che s’inteinda anca dä mia una s’micciäda al compit in class dal cumpagn ad banch, fargä l’ascensore al visein ad cà mälmustus o ‘l pustegg’ a lelü c’at vëd in da speccin c’al tira di sacarnon.

Non dire falsa testimonianza

Falsa testimonianza? Oh ma quant salamelecchi par dì da cüntä mia ad ball. G’ho in a meint che ‘l nümar ott al sarà annüllä, un’amnistia, se no as cattum tütt in un inferan c’al pär la féra ad Sant’Antunein sutt sira quand gh’é bell frësch.

Non desiderare la donna d’altri

Ah ah ah ah ma va a plä di balitt va, ma che rassa ad cumandameint l’é? Sa l’é brütta la desidar mia sicür e po’ allura at gäva da fäm un sarvéll ca ragiona mia pösé alla svélta dal mé istint , oppür tiräm via la vista e forsi anca quälcos’ätar…Chemò g’arum da bravä abota g’ho in a meint.

Non desiderare la roba d’altri

A pärt al fatt ca s’at gavriss avì la mé prufesurëssa d’italian la ta dśiva sübit che “roba” al sa scriva mia parché l’é tropp generich, ma ad ogni möd sta pür tranquill ca g’ho appèna ‘l teimp da desiderä la mia e l’ünich difett can g’ho mia l’é propi l’invidia par la roba (mè pöss druäl parché sum mia ‘l Signur) ad iätar. Atsé ad occ’ e cruś m’la cavarò con dü o tri secul ad pürgatori, dopa sperum che in paradis agh sia mia tropp regul e gint ca löia da fä custi e fä mia quèll se no tögh so tütt ill mè carabattul e s’ciau.

E viätar?

Pietro “Pedar” Rebecchi

> Se sei su Facebook, segui Sportello Quotidiano cliccando qui
> Se ti piace leggere gli approfondimenti di Sportello Quotidiano, scopri la raccolta cartacea cliccando qui