Seguici su

↓ Gioia Web Radio - La voce degli studenti ↓

Ascolta "#OfficinaPiacenza: ballottagio. Intervengono Patrizia Barbieri e Paolo Rizzi" su Spreaker.

Ill Baccaiäd

La famigerä “legge di Murphy” (di Pietro “Pedar” Rebecchi)

Ill Baccaiäd è la rubrica in dialetto piacentino a cura di Pietro “Pedar” Rebecchi per i lettori di SportelloQuotidiano.com (foto di Marco Caviglioni)

Pubblicato il

4 minuti di lettura

Donca, śà la vita l’é un lotta cuntinua, seinsa un mumeint ad päs, seinsa un attim par fä ripusä ‘l sarvell, allura ma dmand : parché g’um da fä i cöint anca cun la famigerä “legge di Murphy” ? E po’, ma chi l’era chelü ? V’al digh mè : un inśgnér areonautich american.

M’al gäva propi ätar da fä che insgnä al mond che se una roba la pudriss andä mäl at pöl astä tranquill cl’agh và sicür ? Al pudiva mia siguitä a stüdiä i sò avion e fä in mod e manera che d’ogni tant na daga mia śù mia quälcadöin ? Inveci no, lü e la sò legg’ is preseintan regularmeint in dal noss tran tran ad tütt i dé.

Laśum astä la fëtta biscuttä che quand la casca l’as poggia seimpar dalla pärt ad la marmlä atsé s’incaculla tütt al pavimeint…s’la va bein…parché s’la va mäl s’immardélla al tapéd, ad matteina, apéna dosd…böna giurnä.

Parché quand at riv dadnans alla porta ad cà cun quàtar burs ad la spesa par man stà pür sicür che ill ciäv par vér la porta ien in dla sacośa sbagliä ? Té at pogg’ par tèrra ill burs in dla sinistra e oplà, ill ciäv ien in dla sacośa déstra. Dill voot peins chi sa spostan da par lur.

Sicürameint al siur Murphy al và d’acordi cui cellülär, s’at gh’è la battéria al massim i san gniàn sa t’é al mond, ma s’la fà tant d’arivä sùtta all’ott par seint t’è bon da ricev una telefunäda dal Papa, vüna dal Presideint dla Repübblica  e un’ätra dall’inferan parché i sercan una alma generusa ca giüsta ‘l cundisiunatur.

Parché sa fagh cascä una gussa d’acqua, prima c’la tucca par tèrra ariva mé muier ?

Viätar, quand sì in macchina, pruì sultant a pinsä : al prim semafur russ rispond al messagg’ o dò una smicciäda al titul dal giurnäl. Pär ca tütt i semafur is mëttan d’accordi e d’impruviś ien seimpar vérd, vigliacch se una vota al cambia culur intant ca t’è dré arrivä, precis tant cmé quand t’é da frëssa via….

Parché al śüpermarchet g’ho seimpar dadnans la vacina c’la cöinta i sòd in centesim, la cata sö tütt i bullein pusibil, l’ha mia pśä un pum e la mëta via la spesa cun la velucitä d’una bisascüdléra śopa ?Grasie al siur Murphy ho lassä lé da guardä il prevision dal teimp, tant al sò śà : cumincia a piöv quand port föra ‘l can e laśa lé quand ariv a cà…quand la va bein…parché quand la và mäl guärd föra dalla finéstra…lübbia mia…laś a cà l’umbrella…ariv in sa spigh…e sù dl’acqua.

Parchè quand g’ho tütt al teimp dal mond l’ascensore l’é seimpar al mè pian ma quand sum in ritärdi la catt al piano terra ? E menu mäl c’la pöl mia andä pösè in bass se no sum cunvint c’la pudriss purtä sö quälca dasprä cul cundisiunatur in man da giüstä.

E quand at vé in posta ? At gh’é al logh a sarnì la fila pösé cürta, lemò at catarä seimpar al padélla c’al fa dasdott uperasiòn. Menu mäl c’adess i’han miss i nümar, atsè, pr’una vota, al siur Murphy al pöl andä in sla furca.

Parché sa stò in sla tumana un’ura süceda gninta ma sa fagh tant da mët un pé in dla doccia söna ‘l telefun ? Pudriss andä inans ancura par méśa giurnä ma tant…

Cär al mé Murphy, t’é quäsi luiä, quäsi quäsi sperariss c’at fiss all’inféran, cui cundisiunatur rutt e sa fiss atsé at gh’é ‘l logh a ciamä l’ascensore !

                                      Pietro “Pedar” Rebecchi

 

Nato a Piacenza nel 1966, ha sempre coltivato al passione per la cultura piacentina. Grande tifoso del Piacenza Calcio, è anche autore e attore teatrale della "Famiglia Piasinteina":