Seguici su

↓ Gioia Web Radio - La voce degli studenti ↓

Ascolta "#OfficinaPiacenza: ballottagio. Intervengono Patrizia Barbieri e Paolo Rizzi" su Spreaker.

Ill Baccaiäd

Tütt al mond l’è paes (di Pietro “Pedar” Rebecchi)

Ill Baccaiäd è la rubrica in dialetto piacentino a cura di Pietro “Pedar” Rebecchi per i lettori di SportelloQuotidiano.com (foto di Marco Caviglioni)

Pubblicato il

3 minuti di lettura

Finalmeint in Arabia anca ill donn i pudran ciapä la pateinta, giüst atsè.
L’üguaglianśa cun i’omm l’è un diritt sacrusant e gariss da iess atsé dapartütt e par tütt ill rob.

Tant par cuminciä i caruśer dal post i’han decis da pruclamä cul dé lé fésta naśiunäla dla categuria.

L’é mia sultant una question ad pateinta parchè anca lamò adessa i pudran pèrd dill meś giurnä par cattä la ciäv in dla bursëtta, rituccäs al trücch intant ca ien feram al semaforo , däs una sistemäda all’acconciatüra o magäri una spulveräda al crüscott intant chi aspettan un sò amisa con un brisinein ad ritärdi.

Anca lamo’ as pudrà vëd una quälca donna ca taca da lìid cul self-service o cl’as guärda in gir in dla speranśa c’arriva un’alma gentila a dägh una man, almenu par savì s’agh völ la nafta o la benśina.
Anca lur finalmeint i pudrann pruä l’emusion da girä seinśa mët föra la frèccia e pudì accumpagnä la svolta cun la culonna sonora di clacson ca söna e dill marianass ca vula via.

Sicürameint impararan alla svélta a cicciarä cun l’amisa da pärt rigurusameint a treinta all’ura e in meśa alla strä, a surpassä i ciclista talmeint a tacca che la biciu la ciapa ‘l culur ad la macchina.

Par iess mia da menu al rèst dal mond i farann di pustegg’ fantasius, i ciaparan la mśüra in möd e manera d’ocüpä ‘l post ad du macchin e se par cäs i sücan i saran bon da negä ogni respunsabilitä dadnas al pär o al marì. Bravä cul navigatur la dvintarà una priuritä anca lamò parché sia mäi dit che lü anna sà pösé che lur in sla strä ‘gh’é da fä.
Am risülta che tütt i mecanich i garan, ubligaturiameint, da partecipä a di curs pr’imparä a capì cusa s’é rutt o cusa ciocca quand is preseintaran lamò e pudì dä una quälca spiegaśion cumprensibila e intant chi gh’èn slungä un po’ d’oli in dal cambi e in dla frision.

Anca i’arab i pudran vëd un quädar che noi um vist una müccia ad vot e ciué una macchina férma da pärt alla strä con una donna cla guärda pìina ad ricunuscinśa un om südä möi cal cambia la gumma e al pröva gnan a spiegä ca l’è mia atsé dificil tant la prossima vòta la catarà un ätar luccon cal sa férma. Anca i prufil dill citä i cambiaran parché i märciapä i pardaran tütt i’angul, quälca “panettone” longh a sücäl al ciaparà la furma d’un öv ad Pasqua e i guardrail i sa smeiaran a di quädar ad Picasso. Par fä propi ill rob cm’as dev seins’ätar i giraran in scüron seinsa pisä ‘l lüś e i mandaran in sla furca quälca povar diävul cal lampegiarà par mëtagh una pülga in dl’uriccia e quand i vadran un post ad blocch in un amen i cuntrularan sa ien miss alla via un po’ bein e i prepararan al suriś pösé smagliant cuminciand a śbarbatä ill parpell.

Par i’om inveci cambiarà gninta (bein…quäsi) e i pudran siguitä andä cmé di diśgrasiä, tirä di sacranon ca fà lüś, pinsä da ies i padron dla strä e suartütt scaculäs, fä sö ‘l ballein e träl föra dal finestrein, anca cun la rima.

                                      Pietro “Pedar” Rebecchi

Nato a Piacenza nel 1966, ha sempre coltivato al passione per la cultura piacentina. Grande tifoso del Piacenza Calcio, è anche autore e attore teatrale della "Famiglia Piasinteina":