Seguici su

↓ Gioia Web Radio - La voce degli studenti ↓

Ascolta "#OfficinaPiacenza: ballottagio. Intervengono Patrizia Barbieri e Paolo Rizzi" su Spreaker.

Ill Baccaiäd

Sügaman! Al süpereroe piasintein (di Pietro “Pedar” Rebecchi)

Ill Baccaiäd è la rubrica in dialetto piacentino a cura di Pietro “Pedar” Rebecchi per i lettori di SportelloQuotidiano.com.

Pubblicato il

Sügaman! Al süpereroe piasintein
5 minuti di lettura

Uramäi gh’é di supereroi ad tūtt i tipu, gross, picin, ca sälta, spūda e i van tant fort chi sarissan bon da fä la puar in dl’acqua. Quand mé séra un smurcion pirläva seimpar i solit tri o quatar, adesa ogni tri par dū na sälta föra vöin. G’ho mäi cardì, almenu fein che n’ho vist vöin anca mè, propi atsé, una sira ca giräva in sl’ärśan dal Po ho sintì un rumur dadré una seś e in un ditt e fatt sälta föra un parsunag’ vistì ad bianch e russ cun tant ad tabar, una mascareina in s’iocc’ e in sa stumagh quatar disegn’ : la pulla, l’ass ad baston, l’angil e l’ass ad cupp. Un fisich mia propi sculpì, un bell päri ad barbiś e di scintillion ca quatäva sö quäsi tütt ill ganass.

“ Oh bèla – digh mé – e lü chi ‘l sariss ad graśia ? Süpermen ? “

“ No – al fà –  me sum Sügaman! Al süpereroe piasintein !”

“ Ma dabon ? Ma donca, e parchè al s’é mäi fat vëd in gir ? “

“ Parché sum piasintein e fagh ill rob in nascundon e po’ an g’ho mia vöia da dvintä famus che dopa la gint l’am férma par fä i selfi e am cat in un amen a ‘ndä a salvä i gatein in sil piant. M’arcmand è, c’al vaga mia a dì c’al m’ha incunträ. Al g’ha da śūrämal ! C’al pösa pö mangiä un piatt d’anvein ! “

“ Parbaccu – rispond – c’la staga pūr tranquill “

“Bon, adèssa però c’al sa scönda “ “ Parché mäi ?”   “Parchè sum dré a cūrä s’arriva Torrazzomen, da Carmona, al fa ‘l fūrb è lalū parché ‘l vuriss duminä anca in sal noss Po ma mé, Sūgaman, al parmëtarò mäi !”

A cul pont lé al m’ha dat un sbūrlon e sum rūglä in un canäl e menu mäl parchè Torrazzomen l’è arivä in sal seri, vistì da Torrazzo (che fantasia…) cun tant d’arlog’ astrunomich, un salam cremunes in una man e un turon in dl’ätra. Apéna Sūgaman all’ha vist al gh’é burs e da suta ‘l tabar l’ha tirä föra un salam, talmeint stagiunä ca’l’äva cumprä da un antiquäri. Torrazzomen al gh’é rastä mal quand al sò salam l’é stä taiä in dū tant cmè s’al fiss būter e allura cul turon l’ha pruä a däl in tésta al noss difensur ma lū al s’é spustä, all’ha ciapä in sal coll e l’ha trat un téra ad marianass ca fà lüś, tant che al cremunes l’é rastä un atim imbacücchì e al s’é catä ‘l piasintein in sla pansa c’al g’arfiläva di lävadeint.

“ Té chemò at gh’é mia da fät vëd et capì ? L’é una vita c’at ciap sö, t’èt gnamò stüfä ? “

Ma quand urmäi la lotta la pariva finì Torrazzomen l’ha śügä ‘l giolli e da una sacośa l’ha tirä föra un scartussein….ad mustärda ! Nooo !! Propi l’ünica roba al mond ca fà indebulì Sügaman c’la cuminciä a dvintä russ cmé un pivron, a südä frëdd cul gamb chi sbarbatävan e’l respir pesant.

Am sum guardä inturan par sarcä quäicoś da pudì aiütäl ma gninta, lü al m’ha vist e ‘l guardäva in mira alla seś in dua l’era prima, allura sum andä a vëd e ho truä un bell tond ad picula ad cavall.

L’antidoto !! Gl’ho lanciä sübit e lü ann’ha brancä un bell ettù al vul, apéna l’ha fatt effét l’ha ciapä Torrazzomen pr’al coll e al g’ha dat un lanc’ che prima c’al ‘riva a Carmona al fà ‘l gir dal mond un päri ‘d vot, lü e la sò mustärda. La scapäva tant fort che la sò umbria la fäva  fadiga a stägh a drè.

Ma la lotta par difeind la sò tèrra par Sügaman l’era gnamò finì. Gnan ‘l teimp da dä śù la puar al tabar ch’è ‘rivä Parsütmen, da Pärma, un tipu cun la bucca talmeint lärga che (vist ca sérma a Po e gh’é la fabbrica dill ciribigul) tra un mulär e l’ätar l’äva muntä una zanzariera, natüralmeint dop.

Sügaman as l’aspetäva mia m’al pariva tranquil, la scorta ad picula ad cavall l’era gnamò finì…

Parsütmen inveci l’ha cuminciä a tirä dill cupp (ad Pärma) intregh ma ieran talmeint poch stagiunä che quand i tuccävan par tèrra saltäva föra i sanfein e i turnävan indré. Sügaman alùra dall’umbarsäl l’ha fatt partì un raggio laser ca trasmëta l’ümiltä e intant l’andäva taca al sò aversäri che pian pianein al s’indebuliva e ‘l sa pigäva in si s’nocc’. Inveci dill carpì dal sò culega Spaidermen, Sügaman l’ha druä spägh c’as dröva par ligä cuppa e salam e al s’é miss Parsütmen in si spall, al m’ha guardä e intant c’al ma schisäva l’occ’ al ma fà :

“ Adess al tach sö in canteina par la stagionadüra. Peinsa quand al ma vadrà ‘rivä cun la güccia pr’asbüsäl ah ah ah pröva a imaginä in dua la sbüs ah ah ah ciau nanu e m’arcmand è, acqua in bocca”

Am sariss cär turnä ragass par pudì mëtt ‘l poster ad Sügaman in camra ätar che.

Pietro “Pedar” Rebecchi

Nato a Piacenza nel 1966, ha sempre coltivato al passione per la cultura piacentina. Grande tifoso del Piacenza Calcio, è anche autore e attore teatrale della "Famiglia Piasinteina":