Seguici su

↓ Gioia Web Radio - La voce degli studenti ↓

Ascolta "#OfficinaPiacenza: ballottagio. Intervengono Patrizia Barbieri e Paolo Rizzi" su Spreaker.

Ill Baccaiäd

Pagüra da ciapä l’areuplan (di Pietro “Pedar” Rebecchi)

Pubblicato il

4 minuti di lettura

G’ho seimpr’avì pagüra da ciapä l’areuplan, l’avion tant cm’illa ciaman i piasintein nustran.

Una roba da cuion parché pasinśa avigh al terrur ad quälcosa ca t’é pruä e t’é strinśì talmeint poch c’al dé dopa at fà fein mäl ill rein ma ‘d vüna c’an ta sé gnan cus völ dì l’è propi da …cuion, appunto.

S’era quäsi stüff da leśś  “cuion” anca in di surris di vanton chi ma dśivan: “ Ma dabon ? T’é mäi vulä ?”. Tant cmé se a lur agh fiss spuntä i’äl !. Me muier c’la sarcäva da cunvinciam śà cun la ciära vision ad noi dü cui pepè a möia in d’un mär dall’ätra pärt dal mond.

“Abbiamo girato mezza Europa in moto e hai paura dell’aereo?”. E cus gh’é da dì ? Gninta, la g’ha ragion. Bisogna ca stüdia ‘l sistema da fä un vul da stä mia in äria abota, ho pinsä.

E chemò me muier la cala l’ass, una mossa strategica da Generale Patton : “ Vai a vedere il Piace in Sardegna, si fa in giornata e il volo dura un’ora.” e mé apéna nasä la pusibilitä da fä una trasférta ad pö agh sum cascä : “T’al śür c’agh vagh”. E atsé ho ciapä l’avion e sum andä a Olbia, par ciapä tri gol ma custi l’é un ätar ragiunameint. Me digh che un burdaläri tant cmé un aeuroport l’ho mäi vist, gint ca và, gint ca végna, gint ca cicciara e vöin, ciué mé, bianch cmé un linśö. Al bèll a l’é chi m’han fatt pasä in un tüb e am sum catä dein seinśa dämna, praticameint séed in sl’äla in d’un post c’al pariva ‘l curidur ad cà mia. La sicürëssa prima ‘d tütt e alura i m’han fatt pruä la cintüra. Pinsäva una cintüra tant cmè la macchina, inveci no, la passa apéna sùtta la pansa e g’ho avì un sgrislon a pinsä che pärt l’avriss schisä par tegnam inciudä in sa scranein. Dopa ‘l capitani l’ha spiegä cusa fä s’is fisan sganciä il mascarein par l’usigen…si…bonanott…dal mumeint chi vegnan śù m’é śà vegn’ un infärt. Dopa l’é stä la vota dal giübott ad salvatag’, un’uperasion c’an finisa mäi, ura cl’é pront t’è śà mort angä e meśś digerì dai pëss.I m’han seimpar ditt che i’ostes ien dill bell fiulein noi inveci gh’é tucä dü om, vöi atsé grass cl’ho mäi vist fruntäl parché par pasä tra i sedil al g’äva par forsa da mëtas pr’asbiès (second mé al giübott ad salvatag’ all’äva mangiä, atsé, par fä prima) e l’ätar atsé vecc’ che al viaś ad rituran all’ha duì pagä parché intant l’è andä in pension.

L’ünich mumeint c’al mé cör l’ha sbarbatä l’é stä apèna deculä quand l’ha girä tütt in un culp, ml’aspetäva mia, can dal tò mond an gh’é mia da strä cusa stèt lemò a fä di ghiri gori, quand am sum guardä inturan ieran tütt bèi tranquill alura ho fatt mustra ad gninta e ho sperä d’andä via bell dritt e suartütt…da stä sö. Un urteina scärsa e sum ‘rivä a destinasion, e vöi…adès gh’é sultant da turnä indré… ma urmäi sincerameint la pagüra l’éra pasä e anca la mé cuscinśa l’äva cuminciä a däm dal cuion. Amen, méi tärdi che mäi. Dopa la partida taca al “gheit” süceda d’incunträ Marilena Massarini e fiöla ( e cagnulein) e atsé cun i’ätar matt ad piasintein preseint um tirä sö una version da städi ad “ T’al digh in piasintein” e i’avantur inturan a noi a fä da spetatur, interesä o menu m’intarèssa mia. Al rituran però gh’éra una ostes ! Sì, atsé brütta che ‘l sò giübot ad salvatag’ l’era dutä anca d’una mascra da carnaväl, pr’aspavintä mia i pëss, in cunfront la fiöla ad Fantozzi la pudriss veins almenu ‘l titul ad miss cundumini.

Véra che la pagüra l’era pasä ma ho mia pudì fä a menu da pinsä che in sl’avion gh’éra tütta la diriginśa dal Piace, i śügadur, la terna arbitrale (propi dadnans a mé),  Marilena Massarini cun fiöla ( e cagnulein) e giurnalista, sa cascämma śù an gh’éra gnan la sudisfaśion da fä ‘l martire parché cun tütt i’autoritä preseint a chi sariss intarasä ad queindas tifus mia tant a post.

Ad ogni möd l’é andä  tütt bein, se no sariss mia che a baccaiä e adess sum pront par fä ‘l gir dal mond, la prossima vota però m’infuram prima in si ostes.

Pietro “Pedar” Rebecchi

Nato a Piacenza nel 1966, ha sempre coltivato al passione per la cultura piacentina. Grande tifoso del Piacenza Calcio, è anche autore e attore teatrale della "Famiglia Piasinteina":