Al süpermarchet (di Pietro “Pedar” Rebecchi)

Cär i mé om l’é inütil ca sla cuntum tra ‘d noi e fum feinta ad gninta, gh’é di post in dua la magiur pärt ad noi la và in dificultä, in dua quand andum dein vadum l’ura da vegn’ föra, vöin ad chisti l’è ‘l süpermarchet. Si. ho capì. gh’é anca quälcadöin c’al pärta cul caréll e al và cal vula, al cata sübit tütt e seinśa gnan un bigliëtt cun la lista. Mé no. Mé sum bon d’andä lamò cul bigliëtt e dasmingäm quälcosa, sbagliänna un’ätra e tönna vüna ca scäda adman, l’é mia ca faga aposta o che cun i’ann sum ‘rivä a cul pont che, no no, sum propi atsé, talento naturale. Forsi sarà parché quand s’éra picin mé nonna l’am mandäva dal lattein, dal pristinär, da bcär e dal frütarö cui mé bèi tri bigliëtt in man, arivä lamò alśiva tütt, gniva föra cun la mé burseina e quand andäva a cà ieran cunteint cmé di stricc’, gh’éra mia un sbalì e ga scapäva anca quälca muneda ad böna man. Adess no, quand vagh a fä la spesa g’ho da pagä, ciap di num da mé muier e ‘d böna man as n’in pärla gnan.

Tant par cuminciä am sariss cär savì al parchè an gh’é mia un carèll c’al vaga via bell dritt, at tuca, ogni seincu pass, driśäl, a menu che at decida mia d’andä via tütt da sbiess, ocüpä la cursia pr’intregh e ciapä di num anca dalla cunfension ad balsamo in uférta.

Dśum la vritä, ill rob i pudrisan iess anca un po’ pösé facil parché as fà bell a dì : compra il detersivo per la lavatrice, po’ at vä dadnans ai scafäl e as véra un mond. Cunfension picin, grand e da esercit, cul dusatur e seinśa, all’udur ad rusmarein,alla vaniglia a möia in dal büter o all’angüria carsì taca a una stabbiera, ad tütt i préssi, cun l’amurbideint o ‘l bacaréll par maśä acari e sbriślä tütt i s’macc’ ad domine e Diu. E té lemò a pinsä che at pöl cumprä cul c’at gh’è vöia che tant…at gäva da tò l’ätar. Parlum mia ad quand at pérd la giuentü dadnas al frigo di iogurt parché ai mé teimp al gh’éra alla banana, ai magiustar e fat in cà cui bigatein. Adèss inveci seinśa grass o cui toch ad gogn’, cul latt ad söia o ‘d cräva, seinśa lattosio, da bév o da sganasä, cun da pärt di vaschëtt par mëtagh dein di paciügh, chi vegnan dall’ätra pärt dal mond o diretameint cun deintar di frütt intregh.

Quand finalmeint t’é stä bon da séran ta scapa l’occ’ e ‘t vëd lü : l’Activia cun quatar miliärd ad bifidus par bucin. Quatar miliärd ? E parbacu a sò gnan si ga stan tütt in da stumagh !

Quand t’é finì da fä la spesa gh’é d’andä alla cassa e cumincia un’ätra battaglia, prima ‘d tütt cul vacin c’al g’ha in man al giurnäl e un miccon ad pan e ‘l ta guärda cun la speranśa ca t’la faga pasä parché al fà alla svélta e pütost che druä la “cassa veloce” al sa fà impicä e stagiunä in dal repärt di salüm. E no cär al mé pensiunä, té sicürameint at gh’é pösè teimp che mé e i cantier i sa spostan mia. La guèra pösé da trincea l’é quand as seinta….dlin dlon…apre cassa 4…e lemò at vëd dla gìint cla scata vérs la pusiśion e vula via dill carelä ca gh’é i scintill ma tütt i restan fargä dal bell tipu c’al sé catä propi lemò dadnans e op, al s’infila tra i dü caréi intant c’al vegna mandä a cul paeś là. Ociu però anca alla vacina dadnas a té parchè immancabilmeint, una vota ca t’é sistemä la spesa in sal rüll e t’é pront a ingagiä un duéll ad velucitä cun la casséra par leimp ill burs intant che lé la t’insurdisa cui bip bip, l’é la g’ha da pagä e la tirä föra i centesim dal bursein (vöin alla vota), cuntä i bulein e mëtt al sicür la teśra cui pont magiustar. Ma finalmeint at vegn’ föra e at pass, d’estä, dai menu quatar gräd ad deintar ai quarantadü dal pustegg’, un meśś balurdon, un po’ ‘d saracch e ‘l riva lü, al diversameint pigmantä : ehi amigo bosso garrello ? Una vota g’ho ditt ad sì parché g’äva un caréll cl’andäva via talmeint astort che prima ch’infrinśä la cadeina par recüperä l’euro l’ha fatt al gir dal quartier.

Pietro “Pedar” Rebecchi