Seguici su

↓ Gioia Web Radio - La voce degli studenti ↓

Ascolta "#OfficinaPiacenza: ballottagio. Intervengono Patrizia Barbieri e Paolo Rizzi" su Spreaker.

Ill Baccaiäd

Urmäi in television i fan vëd dal tütt, föra che dla roba bella (di Pietro “Pedar” Rebecchi)

Pubblicato il

5 minuti di lettura

Urmäi in television i fan vëd dal tütt, föra che dla roba bèlla, as sälva giüst giüst quälca film e quälca trasmision d’atualitä. Pr’al rést un cridur, dill vot sum bon da pasä una smàna seinsa pisäla, al màssim un telegiurnäl e una partida ad futbal, sa l’é mia dal Piace, se no sum a städi, ätar che tumana. Cumincium dai realiti sciò, g’ho ancura da capì in dua i garisan da ies interesant, prima i trävan in una camra una diseina ad parson chi siguitävan a bravä tütt al dé, ieran mia bon da fä la O cul bicer e parlum mia da fä un pensier articulä in una sérta minera e i lucon dadnas alla tele a guardä chelur ch’is gratävan il ball tütt al dé, dopa gh’é stä l’evolüsion : Gf Vip. Oh bèla, una vota ca g’ho dat un’uciä la metä ia cugnusiva mia, ill donn ieran strücä e ho fat fadiga anca cun lur e i dü o tri ca säva chi ieran i runfävan chi parivan di tratur d’epuca. Propi interesantisim, sò mia m’ho fatt a fänna a menu fein almé dess.

Cambium canäl e as na cata sübit vöin in dua i fan da mangiä cun d’ingredint c’ho mäi sintì numinä par po’ ciapä di num da lelur ca giüdica, e custi l’è salä e cl’ätar l’é mia cott a sé e vöin al sa preseinta mäl. Oh ma che mäl ad pansa ! Si fisan śà bon i sarisan mia lè.

Tütt il turt ad domine e Diu ho vist fä, lalü, al Boss, al fà di monümeint ca sa ia faris mé al prim c’al va a taca par dägh un sgagnon al ga lassa la dintera. Ma éla una roba logica laurä una smana par fä una turta e dopa gh’é di labron che in un amen i mangian anca ‘l tond ?

Via via, ätar canäl e i fan vëd di sugèt ad tarśeint chilu chi völan vegn’ mägar, śà cul prüfum c’ariva dall’ätar prugrama ga da ies un patimeint. Gint ca crida parché longh a mangiä veintott ciupein, treintadü fëtt ad turta, meś cinghiäl, dü anarot e un camp ad pum da tèrra fritt ien andä suarpes.

Ma va ? L’avriss mäi dita una roba cumpagna, ho seimpar pinsä che dopa una gugnäda bastäva fä una farmäda in sla taśa par dascargä ‘l bèll e ‘l brütt. At vëd è dill vot a ies ignurant ?

Dopa gh’é anca la Maria c’la s’impegna a catä ‘l murus a dill bèll fiulein e i fan dill discüsion ch’in finisan mäì parché t’é smiciä lalé e parché at mé mia scritt e guärda ca föra na catt fein che agh n’ho vöia. E alura sa fét lemò? Dopa quand is mëtan insëma via, all’isula dla tentasion, in dua i masc’ i van in un sid pin ad gnocca ca sa strüsa e ill donn dua gh’é di mascion palesträ e tatüä. Atsé is mëtan di bei curnein, is molan e turnan a “ Om e donn” a cuminciä da capo. Praticameint l’ha miss in pé una cadeina ad muntagg’. Mia cunteinta l’ha fatt anca la version pr’i pensiunä e par donn e om ad meśa etä. La prima spunsuriśä da una märca ad pannoloni e la seconda da dü alevameint, vöin ad méral e l’ätar ad marlüs, in ümid però.

Mé fiöla la guärda “Amici” e i talent, bein, almenu lemò gh’é anca quäldoin ca l’é bon da fä quälcosa d’interesant, al prublema l’è che longh a fä vegn’ föra di cantant urmäi tütt i vusan ma ansöin al sa fiacca a cumprä un disch e longh a fä vegn’ föra di balarein is pistan i pé.

Chi c’am divérta pö ‘d tütt però ien la televendite, un spetacul cui fiocch.

At gh’é una pansa cla pär un’angüria ? Pröva la nossa macchina par fä i’aduminäl, déś minü al dé e oplà, gh’é la bisascüdléra e al bèll a l’é c’at pöl mangiä tant cmé prima. Deś  minü al dé ! Agh saris da träia dein e trä via la ciäv ma anca i fasulon ch’il compran….

Vöt fä l’afäri dal secul ? Guärda chi anéi ché e cla culana ché, i custarisan tri milion però istasira, apéna pr’istasira ia vindum a veint’euro däi däi movat, at vurä mia fät ascapä un’ucasion cumpagna ?

E cl’arlogg ché ? Al mond agh n’é quatar esemplär e v’al regalum. Par forsa, al fa talmeint gomit c’al vuris mia pr’al mé can ! E i veindan ogni sorta ad tarabacul, curtei ca täja ‘l fèrr, e vuriss admandägh parché i peinsan che a cà mia as mangia dla cäran atsé düra. Matarass ca ciapa la furma dal corp intant c’at pisul, di barachein par mëtagh deintar l’acqua par po’ fäla vegn’ föra ancura, parüchein da om che second lur i päran propi mia di cavì feint, infatti no, i päran di gatt mort e in decumpusiśion però, cun la culurasion bèlla növa. E par finì lè, l’älga miraculusa dal mär dei Sargassi cla fà sparì cumpletameint i segn’ dla vciäia, la rinvigurisa la pèll, la tira via i smacc’ e po’ second mé quand la śüga crësa di fiur. Guardum un po’ menu lucäd e guardumas pösé in d’iocc’ va la clé méi.

                                            Pietro “Pedar” Rebecchi

Nato a Piacenza nel 1966, ha sempre coltivato al passione per la cultura piacentina. Grande tifoso del Piacenza Calcio, è anche autore e attore teatrale della "Famiglia Piasinteina":